COVID-19 Paniek ('n Bybelse Aanslag)

Covid-19: ‘n Bybelse Aanslag op Massa-Paniek

Rudi van Zyl

2020-03-23

In 2Timótheüs 1:7 lees ons:
"Want God het ons nie ‘n gees van vreesagtigheid gegee nie, maar van krag en liefde en selfbeheersing."

Die gesegde “’n week is ‘n lang tyd in die politiek’ beteken dat daar baie dinge binne ‘n enkele week kan gebeur in die politiek. Hierdie afgelope week moes ons besef hoeveel dinge in ‘n enkele week in die wêreld kan verander. Was dit die mikroskopies-kleine Covid-19 virus wat baie bedrywighede oor die hele wêreld tot stilstand gebering het, of ten minste verander het? Was dit nie eerder die mens se paniek oor hierdie virus wat te blameer is vir hierdie wêreldwye ellende nie? Ek is geneig om laasgenoemde te glo.

Woorde kan nie die graad van massa-paniek beskryf wat tans heers nie. Covid-19 oorheers die nuusmedia, die sosiale media, gesprekke tussen mense, en vele meer. Met die inligting wat tot my beskikking is oor die effek van hierdie virus kan ek nie anders nie as om te vra: “Waarom hierdie massa-histerie?” Ek wil dit duidelik stel dat ek besef dat hierdie pandemie baie ernstig is. Ek hou rekening met die feit dat dit hoogs-aansteeklik is en vinnig versprei. Ek is nie onbekend met die feit dat sommige mense intense lyding ervaar as gevolg van hierdie virus, en selfs sterwe nie? Om ‘n geliefde te begrawe is ‘n tragedie wat enige mens wil vermy. Tog, wanneer al die feite wat vir ons deurgegee word oor hierdie pandemie in ag geneem word bly die vraag: “Regverdig dit hierdie massa-paniek?”

In ‘n berig getiteld “Gaan SA Oorleef?” wat 19 Maart op Maroelamedia verskyn het word die volgende stelling gemaak:

“Die paniek wat Covid-19 tot gevolg het hou volgens verskeie kenners meer gevaar in as die siekte self.”

Hierdie paniek wat deur die media aangeblaas word sleur nie slegs die ongelowiges mee nie, maar selfs die kinders van die Here word meegevoer met hierdie massa-paniek. Dít is egter nie God se wil vir ons nie. Die Here Jesus wil nie hê dat ons in angs moet lewe nie. Die weergebore kind van God is wel ín hierdie wêreld, maar nie ván hierdie wêreld nie. Daarom mag ons nie toelaat dat ons vervul word met paniek nie.

Om hierdie paniek te kan begryp sal dit nodig wees om eerstens die onderwerp van die paniek te verstaan.

1. Onderwerp van die Paniek:

Die Covid-19 virus is die onderwerp van hierdie wêreldwye paniek, maar waar kom dit vandaan?

Verskeie verklarings word gemaak, naamlik:

1.1 Goddelike Wraak:

Mense van verskillende gelowe glo dat húlle god besig is om hul opponente te straf. So berig Times Live dat Zimbabwe se minister van Verdediging en Oorlogsveterane Oppah Muchinguri Kashiri die volgende verklaring gemaak het:

“Coronavirus is punishment for the West imposing sanctions on Zimbabwe”.

Sulke stellings moet behandel word met die minagting wat dit verdien. Dat die Waaragtige Drie-Enige God van die Bybel wél sulke metodes gebruik om bemoeienis te maak met die mensdom of selfs te vergeld kan egter nie betwis word nie.

Die Here God het aan Israel sekere seëninge belowe as hulle Hom sou gehoorsaam, maar dan het Hy ook hulle gewaarsku teen die vloeke wat hulle sou tref as hulle Hom nie gehoorsaam dien nie. So lees ons in Deuteronómium 28:66-67:

“En jou lewe sal voor jou aan ‘n draad hang, en jy sal nag en dag skrik en van jou lewe nie seker wees nie. In die môre sal jy sê: Ag, was dit maar aand! En in die aand sal jy sê: Ag, was dit maar môre! —vanweë die skrik van jou hart wat jou sal aangryp, en vanweë die gesig van jou oë wat jy sal sien.”

So sê die Here ook in Jesaja 66:4:

“so sal Ek ook hulle ongeluk verkies en wat hulle met skrik vervul, oor hulle laat kom; omdat Ek geroep en niemand geantwoord het nie, Ek gespreek en hulle nie gehoor het nie; maar hulle het gedoen wat verkeerd is in my oë, en verkies wat My nie behaag nie.”

Sou hierdie pandemie Goddelike wraak wees, is dit egter geregverdig. Die sondes van die mensdom roep om vergelding!

1.2 Natuurlike Pandemie:

Sommiges beweer dat Covid-19 afkomstig is van diere soos slange en vlermuise wat op die kosmark in Wuhan verkoop is. Of dit wel die waarheid is weet ons nie.

Wat ons wel weet is dat die Here Jesus vir ons vooruit gesê het dat die uitbreek van pessiektes een van die tekens is van Sy naderende wederkoms.

Ons lees in Lukas 21:11:

“En daar sal groot aardbewings op verskillende plekke wees en hongersnode en pessiektes; en daar sal verskriklike dinge en groot tekens van die hemel kom.”

Alhoewel die voorkoms van pandemies geensins iets nuuts is nie is die toename en intensiteit daarvan wel.

In 2007 skryf Jaap Dieleman in sy boek getiteld ‘Die Koms van die Koning der konings’ bl 61 die volgende:

“’n Paar van die peste wat ons die afgelope paar jare gesien het, is varkgriep, bek-en-klouseer, malkoeisiekte (BSE) en voëlgriep (SARS). Die naarstigtelike vrees bestaan dat die voëlgriep van Asië, wat onlangs oor die hele wêreld versprei het, dalk kan muteer in ’n moordende siekte vir mense. Dit is egter nie bloot verdoemende denke nie, want in die Middeleeue het die builepes 50 miljoen mense se lewens geëis in Europa.”

Ø Vigs:

“Vigs het ook oor die hele wêreld versprei en al miljoene mense se lewens geneem. Sedert die eerste Vigs slagoffers, het hierdie virus al gemuteer in baie meer dodelike variëteite. En wat van die hoogs aansteeklike Ebola-virus, wat slagoffers daarvan binne enkele dae laat sterf, hulle laat dood bloei op ‘n baie pynlike wyse?”

Ø Malaria:

Volgens die Wêreld Gesondheid Organisasie se berig gedateer 28 Junie 2019 sterf daar elke 2 minute ‘n kind aan Malaria. Dit beteken dat daar jaarliks 262 800 kinders sterf aan Malaria! Die volgende stelling word dan gemaak:

“Each year, more than 200 million new cases of the disease are reported”.

Ø Kanker:

Statistiek deur die Internasionale Vereniging vir Kankernavorsing vir 2014 toon dat ongeveer 14 miljoen mense per jaar met kanker gediagnoseer word.

Volgens LifeNews sterf 8,2 miljoen mense jaarliks aan kanker!

Ø Depressie:

Die Burger van 2012-10-10 het 'n artikel geplaas onder die titel ‘Depressie - die siekte wat verswelg’. Hierdin word Depressie beskryf as ’n “Globale Krisis”. Dan word gesê:

“Depressie is wêreldwyd die derde grootste siekte, maar sal teen 2020 die tweede grootste wees, en teen 2030 die heel grootste”.

“Volgens statistieke ly tussen 350 en 400 miljoen mense aan ’n psigiatriese siekte.”

“Jaarliks sterf byna 1 miljoen mense aan selfdood.”

Die volgende statistiek word bekend gemaak in 'n dokumentêr getiteld ‘Making a killing’.

Hiervolgens is daar huidiglik 100 miljoen mense op psigiatriese medikasie soos anti-depresante!

As jy kyk na die massa-paniek oor Covid-19, weet dan: ‘You ain’t seen nothing yet!’. Die Here Jesus het voorspel in Lukas 21:25-26:

“En daar sal tekens wees aan son en maan en sterre, en op die aarde benoudheid van nasies in hulle radeloosheid, wanneer see en branders dreun, en mense se harte beswyk van vrees en verwagting van die dinge wat oor die wêreld kom.”

1.3 Biologiese Oorlogvoering:

Vanuit verskillende bronne word beweer dat die Covid-19 virus egter in ‘n laboratorium in Wuhan gekweek is vir die doeleindes van biologiese oorlogvoering. Enige iemand wat so ‘n moontlikheid sonder ‘n feite-oorweging afwys moet uiters naïef of oningelig wees oor wat agter die skerms aangaan. Die aanwesigheid van magte wat ‘n bepaalde agenda vir die mensdom dryf is lank al geen geheim meer nie.

Dr. John Hagee skryf in sy boek ‘Attack on America’ bl 124:

“After the First World War, several countries began experimenting with anthrax, tularemia, plaque, and yellow fever. In 1989, the CIA learned that a vast complex of buildings in the heart of Russian Siberia was the center of what is called black biology. The program is called Vector, and it contains a bank of 10 000 viruses, including 140 strains of smallpox and three kinds of Ebola, the disease that literally causes your internal organs to hemorrhage and disintegrate. A former Russian scientist told journalist Diane Sawyer that the Russians may have engineered a deadly genetic merger – a marriage of smallpox and Ebola. The mortality rate of such a virus would be 90 to 100 percent, and there are no treatments.”

Dr. Robert Jeffress haal in sy boek getiteld ‘Countdown to the Apocalypse’ bl 20 die US Government’s Biomedical Advanced Research and Development Authority aan waar Ebola verklaar word as “a bioterrorism threat”, waarna hy vir Matt Mayer as volg aanhaal:

“Knowing that the Ebola virus is exposing about our known deficiencies, imagine what will happen should a superbug appear or our enemies successfully weaponize a far deadlier virus. The mass casualties from the pandemic influenza bug a hundred years ago would pale in comparison, given modern air travel and far higher population densities.”

So kan daar nog baie feite op die tafel gelê word wat genoeg rede gee om die vraag te vra of Covid-19 nie dalk die produk van die menslike selfvernietigingsproses is nie.

Ons sal nie met sekerheid kan sê wat die oorsprong van hierdie virus is nie, maar wat is die rede vir die paniek?

2. Rede vir die Paniek:

Die afgelope week het iemand op RSG tereg die stelling gemaak dat die angs wat die mense beleef met betrekking tot Covid-19 as gevolg van hul vrees vir die sterflike en die onbekende is.

2.1 Doodsvrees:

Die Bybel leer vir ons in Hebreërs 9:27 dat:

“die mense bestem is om een maal te sterwe en daarna die oordeel”.

Vir die massas mense wat nog steeds in hul sondige verlore toestand is waarin hulle gebore is, is die dood angswekkend. Hulle vrees daardie gebeurtenis en wil dit ten alle koste uitstel vir so lank as moontlik, wetende dat hulle die afspraak met die dood nie kan vermy nie.

Vir die ware weergebore kind van God wat in heiligheid met Hom wandel is die dood geensins ‘n ramp nie. Soos die Apostel Paulus kan hy ook sê:

“Want vir my is die lewe Christus en die sterwe wins. Maar as ek in die vlees moet lewe, dan beteken dit vir my vrugbare arbeid; en wat ek sal kies, weet ek nie. Want ek word van weerskante gedring: ek het verlange om heen te gaan en met Christus te wees, want dit is verreweg die beste” (Filippense 1:21-23)

2.2 Onsekerheid:

Die ongeredde mens se paniek oor die onsekerheid van die toekoms is te begryp wanneer jy sien hoedat hulle hul hoop plaas in aardse dinge soos geld. Hulle soek sekuriteit op verkeerde plek, en daarom is die toekoms vir hulle donker.

Iemand wie se lewe egter aan die Here Jesus oorgegee is vertrou op God ook wat die toekoms betref.

Maar ook is die toekoms nie onseker vir die kind van God nie, die toekoms is vir ons beskryf:

In Openbaring 1:1 lees ons:

“Die openbaring van Jesus Christus wat God Hom gegee het om aan sy diensknegte te toon wat gou moet gebeur”

Bybelprofesie berei die kind van God voor vir die toekoms, geen wonder vers 3 sê:

“Salig is hy wat die woorde van die profesie lees, en die wat dit hoor en bewaar wat daarin geskrywe is, want die tyd is naby.”

2.3 Misplaaste Prioriteite:

So skrikwekkend wat Covid-19 ookal mag wees is die massa-paniek hieroor die produk van misplaaste prioriteite. Ek kan verstaan dat die ongeredde mense paniekbevange is oor dit, maar wat ek nie kan verstaan nie is dat weergebore kinders van God toelaat dat hierdie paniek hulle meevoer. My vraag is:

“Waar is ons ontsteltenis oor dinge wat baie erger is?”

Ø Vervolging van Christene:

Waar is ons bekommernis oor die 50 000 mense wat in Noord Korea se gevangenisse en arbeiderskampe aangehou word as gevolg van hul geloof in Jesus? (CT News and Reporting – ‘The Top 50 Countries Where It’s Most Dangerous to Follow Jesus’)

Wat van al die Christene wat daagliks in Afganistan, Somalia, Eritrea, Yemen, Iran, ens. erge vervolging beleef as gevolg van hul geloof?

In ‘The Top 50 Countries Where It’s Hardest to be a Christian’ van 15 Januarie 2020 skryf Jason Casper dat daar elke dag 8 Christene wêreldwyd doodgemaak word vir hulle geloof, 182 kerke word weekliks aangeval, 309 Christene word maandeliks onskuldiglik gearresteer, en 310 miljoen Christene ly tans onder ernstige vervolging!

Ø Alkohol:

Waar is die bekommernis oor wat Alkoholiese drank aan die mensdom doen. Behalwe vir maatskaplike tragedie wat hierdie middel veroorsaak, vernietig dit mense se gesondheid. Volgens die Wêreld Gesondheid Organisasie (21 September 2018) is 3 miljoen sterftes per jaar toe te skryf aan alkohol, wat 5,3 % van alle sterfes is. Verder is dit die oorsaak van meer as 200 siektes! 13,5% van alle sterftes van mense tussen die ouderdomme van 20-39 jaar is toe te skryf aan alkohol!

Ø Aborsies:

Waar is die Christene se ontsteltenis oor die 42,3 miljoen babas wat in 2019 vermoor is deur middel van aborsies? (Volgens Life News). Babas wat wreed vermoor word sonder dat hulle hul stemme kan laat hoor, terwyl die moordenaars van hierdie babas beskerm word deur wetgewing, of selfs deur wetgewing gedwing word om dit te doen!

Ø Verlore Mensdom:

Waar is die bekommernis oor die massas kosbare siele wat verlore gaan ‘n swawelbrandende ewige vuur tegemoet sonder God en sonder hoop! Tussen 2 en 3 mense sterf elke sekonde, die meeste van hierdie mense sonder Jesus Christus in hul lewens!

3. Gevolge van die Paniek:

3.1 Fisieke Gevolge:

Dit is bewys dat mense wat in angs lewe baie meer vatbaar is vir verskeie siektes. Die kettingreaksie wat die Corona-paniek tot gevolg sal hê sal die toekoms leer.

Ek gaan egter bietjie aandag gee aan die volgende drie gevolge van hierdie paniek. Die boeke Daniël en Openbaring beskryf vir ons baie duidelik dat die Antichris ‘n drie-ledige magsbasis gaan hê, naamlik ‘n ekonomiese, politieke en godsdienstige magsbasis. Hierdie afgelope week het dit baie duidelik geword hoe maklik so ‘n drie-ledige magsbasis geskep kan word uit massa-paniek wat deur die media gedryf is. Daarom gaan daar na die volgende drie gevolge gekyk word.

3.2 Ekonomiese Gevolge:

Binne enkele dae het die hele wêreld se ekonomie (wat in elk geval kunsmatig aan die gang gehou was) in ‘n ‘nagmerrie’ ontaard. Drastiese maatreëls is ingestel wat volgens kenners tot baie groot werkloosheid gaan lei, en dit word geregverdig deur die ‘Corona-paniek’. Ek is bewus van kinders van die Here wat met onmiddelike effek geen inkomste meer het nie! Hierdie is nie die gevolg van die Covid-19 virus nie, maar wel van die paniek wat aangeblaas is oor hierdie virus!

Wat verstaan moet word, is dat daar aleeds vir jare beplan word om die ekonomie te ‘reset’. Die huidige ekonomie moet eers in duie stort sodat ‘n nuwe een geskep kan word waardeur die Antichris sy mag kan gebruik. Ons lees in Openbaring 13:16-17:

“En hy maak dat aan almal, klein en groot, en die rykes en die armes, en die vrymense en die slawe ‘n merk op hulle regterhand en op hulle voorhoofde gegee word; sodat niemand kan koop of verkoop nie, behalwe hy wat die merk of die naam van die dier of die getal van sy naam het.”

Dit is geen geheim meer dat daar baie ernstig gewerk word aan ‘n kontantlose een-wêreld geldstelsel. Elke mens gaan ‘n ingeplante mikro-skyfie gaan ontvang op sy regterhand, en dit gaan alle kontant en kaarte gaan vervang.

Die ekonomiese ineenstorting word verder bespoedig deur ‘paniekkopery’ waar mense soos waansinniges met kredietkaarte massas voorade aankoop.

Hierdie wêreldwye ekonomiese krisis maak dit moontlik vir die Antichris om sy ekonomiese magsbasis te implimenteer.

3.3 Politieke Gevolge:

Te midde van hierdie wêreldwye paniek het vele lande se presidente ‘n ramp-toestand afgekondig wat hulle die mag gee om radikale wetgewings aan te kondig. Gepaardgaande polisiëring is skielik in plek gestel. Geleenthede wat astronomiese bedrae gekos het om te reël is skielik gekanseleer en bywoning van samekomste word deur radikale wetgewing beperk.

Skielik is die mens ontnugter deur die feit dat elke mens, selfs in ‘n demokrasie, slegs weerlose subjekte is van ‘n stelsel. Vryheid van ons Godsdiensbeoefening, vryheid van beweging, vryheid om ‘n inkomste te genereer, ens. is skielik in ‘n sekere sin van ons weg geneem en in die hande van die staat geplaas. Ons vryheid om self verantwoordelikheid te neem word van ons weggeneem, want hierdie stelsel soek nie onderdane wat vir hulle self kan dink nie. Hulle wil volle beheer oor almal en alles hê.

Die politieke gevolge van hierdie paniek het ook die tafel gedek vir die Antichris se politieke magsbasis.

3.4 Geestelike Gevolge:

Velede Sondag was daar nog reg oor die land dienste gehou waar daar geen beperking was op die getal bywoners nie. Vandag, ‘n week later, is die meeste kerke in SA se deure gesluit. Alternatiewe soos selgroepe en ‘lifestreaming’ het die samekomste van gelowiges vervang! Alhoewel gesondheidsgevaar van Covid-19 as rede aangevoer word vir hierdie tydelike maatreël, het dit aan ons bewys dat die kerk geen bepalende faktor is waarmee daar mee rekening gehou word nie. Sonder om die Christelike kerkleiers se mening te vra het die regering eensydig hierdie besluit gemaak en afgedwing.

Kinders van die Here word nou geïsoleer, iets wat teenstrydig is met God se Woord. En in ‘n krisistyd soos hierdie waar mense juis die gemeenskap van gelowiges nodig het om hulle geloof te versterk maak kerke hul deure toe!

Baie kerke doen dit egter nie slegs uit gehoorsaamheid aan die landswette nie, maar uit vrees vir vervolging. Dit kan miskien geregverdig word wanneer daar geredeneer word hulle oorweging die gesondheidsrisiko van die gemeentelede is, maar ook het dit bewys hoe vinnig die kerke gehoor sal gee as die Antichris sy verskyning maak en ‘n verbod plaas op enige Godsdienstige bedrywighede.

Wat egter ‘n rede tot groot kommer is, is die paniek wat kerkleiers oor hierdie virus het. Oor jare heen verkondig ons ‘geloof in die Here Jesus Christus’. Nou dat ons geloof getoets word val ons in paniek?

Een van die geestelike gevolge van massa-paniek is egter ‘verharding’. ‘n Mens sou dink dat sulke omstandighede die mens na God sal trek, maar in sommige gevalle is die teendeel waar. So lees ons dat in die komende Groot Verdukking mense hulle sal verhard teen God.

Openbaring 16:11 “en hulle het die God van die hemel gelaster oor hulle pyne en oor hulle swere, en het hulle nie bekeer van hul werke nie.”

‘n Ander geestelike resulaat is egter die moontlikheid van ‘Herlewing’. Ware herlewings in die geskiedenis was dikwels vooraf gegaan deur ‘n nasionale of globale krisis. Hierdie pandemie gepaardgaande met ‘n wêreldwye ekonomiese ineenstorting kan gunstige omstandighede wees waarbinne die mens in sy desperaatheid sy toevlug na die Here Jesus Christus sal neem.

Die probleem is egter dat die Antichris juis sy een-wêreldgodsdiens kan skep deur die ‘samewerking’ van verskillende godsdienste. President Ramaphosa het alreeds met verskillende ‘godsdiensleiers’ vergader en ‘n nasionale dag van verootmoediging word beplan. So ‘n dag van verootmoediging sal geensins God behaag solank as wat daar tot ander gode gebid word nie. So ‘n gebeurtenis sal net sonde op sonde laai! Alleenlik as daar slegs tot die Drie-Enige God van die Bybel geroep word en tot Hóm bekeer word is daar hoop!

Maar wat is die oplossing vir hierdie paniek?

4. Oplossing vir die Paniek:

Niemand van ons se vrywaring van die Covid-19 virus is gewaarborg nie, maar ons mag nie toelaat dat ons deel hê in die massa-paniek wat dit veroorsaak nie. Om verlos te kan word van hierdie paniek, of om dit te kan vermy is vier dinge nodig:

4.1 Verhouding met Jesus:

Elke mens is as gevolg van die sondeval gebore as ‘n verlore sondaar. Elke mens het ook gesondig teen God en verdien gevolglik God se komende wraak in die ewige poel van vuur. Elke mens kan gered word deur sy sondes teenoor die Here Jesus te bely, hom daarvan te bekeer, en sy geloof plaas in die kruisdood en opstanding van die Here Jesus Christus, waarop God antwoord deur die wedergeboorte te skenk en aan hierdie mens sekerheid van saligheid gee.

Elke kind van God wat afgedwaal het of verflou het in sy verhouding met die Here Jesus moet terugkeer na Hom, en sy lewe onvoorwaardelik aan die Here Jesus oorgee en toewy. In Lukas 21:36 sê die Here Jesus:

“Waak dan en bid altyddeur, sodat julle waardig geag mag word om al hierdie dinge wat kom, te ontvlug en voor die Seun van die mens te staan.”

4.2 Produktiwiteit:

Elke kind van God wat nog lewe op aarde is hier met ‘n baie spesifieke doel, naamlik om God te verheerlik. Ons is nie hier om ‘n gemaklike lewe te leef, vry van moeite en probleme nie. Inteendeel, ons is in hierdie Goddelose wêreld waar ons as volgelinge van die Here Jesus ons kruis moet dra en ons taak voltooi. Daarom lees ons ook in 1Petrus 4:2:

“om die orige tyd in die vlees nie meer volgens die begeerlikhede van die mense te leef nie, maar volgens die wil van God.”

4.3 Voortdurende Afhanklikheid:

Die Here Jesus het ons daaraan herinner dat ons nie een el by ons lengte kan byvoeg deur ons te kwel nie. Hy wil nie hê dat ons bekommerd moet wees oor die toekoms nie, maar wel dat ons oomblik-vir-oomblik met Hom sal wandel in afhanklikheid.

Daar is genoeg beloftes vir ons in sy Woord, soos in Nahum 1:7:

“Die HERE is goed, ‘n toevlug in die dag van benoudheid, en Hy ken die wat by Hom skuil.”

4.4. Ewigheidsperspektief:
Sien God se groter plan met ons en hierdie wêreld raak. Moenie ‘aards’ dink nie, maar ‘hemels’. Die Here Jesus kom spoedig ons as sy kinders haal. Daarom dat Hy ook in Lukas 21:28 sê:

“En as hierdie dinge begin gebeur, kyk dan na bo en hef julle hoofde op, omdat julle verlossing naby is.”

Ten Slotte:

Die Here Jesus wil nie hê dat ons in vrees lewe nie, maar dat ons rus in Hom met vertroue. Hy is steeds in beheer, al beheer Hy nie alles nie.

Tog beteken dit nie dat ons roekeloos moet omgaan met iets soos hierdie pandemie nie. Ons moet ons verstand gebruik en alle nodige voorsorg tref soos binne ons vermoë. Die Covid-19 virus is ‘n realiteit en dit hou ongetwyfeld groot gesondheidsrisiko in vir vele mense. Ons moet verantwoordelik optree en nie onsself of ander mense onnodig blootstel hieraan nie. Voorkoming is beter as genesing.

Die belangrikste is egter, moenie meegevoer word met die massa-paniek nie. Hou jou vertroue in die Here Jesus.

Search This Blog

Clocolan Evangeliese Gemeente